Seljord vann kampen om innbyggjarane

Seljord er den store vinnaren i kampen om folketalsauke i Vest-Telemark. I 2009 vart det 41 fleire seljordingar, og auken er i prosent den høgste i Telemark saman med Bø. Kviteseid, Tokke og Vinje har urovekkjande nedgang i innbyggjartalet. Totalt vart det 17 færre vesttelar i fjor.

Forskar Audun Thorstensen ved Telemarksforsking seier at innbyggjartala Statistisk Senteralbyrå (SSB) presenterte torsdag, samla sett er positive for Vest-Telemark-kommunane i høve til tidlegare år. I 2009 vart det totalt 17 færre personar i regionen. Det er langt lågare enn åra før.

– Det er den kraftige folketalsveksten i Seljord som primært gjer utviklinga lysare. Tala fortel om eit tydeleg skilje i attraktivitet som bustadkommune. Nissedal fekk 11 fleire personar og kommunen har no over 1.400 innbyggjarar. Også i Fyresdal held folketalet seg oppe. I Vest-Telemark er det Kviteseid, Tokke og Vinje som slit med folketalsutviklinga, påpeiker Thorstensen.

Når forskaren ser på dei ferske SSB-tala ser han konturar av at urbaniseringa er på frammarsj også i Vest-Telemark. Seljord er den mest sentralt plasserte kommunen i regionen. Her er ein stor detaljhandel med mange tilbod, og ikkje minst er kommunikasjonane gode. Avstandane er korte til Bø, Grenland og Oslo.

Regional tilflytting

– Me har ikkje nok data for å seie at folk flyttar til Seljord frå andre kommunar i regionen. Frå Midt-Telemark veit me at personar både i Sauherad og Nome flyttar til Bø. Difor er det relativt truleg at ein del av den folketalsveksten Seljord opplever skuldast tilflytting frå andre kommunar i regionen, meiner Thorstensen.

Elles nemner han at Seljord har satsa på å skape eit fint sentrum.

– Det er ikkje mykje som manglar av tilbod i Seljord. Staden utkrystalliserar som det reelle regionsenteret i Vest-Telemark. Trenden med omsyn til folketalsutviklinga har vore positiv i Seljord dei siste tri åra, og det er dei aleine om i regionen, seier Thorstensen.

At Nissedal auka folketalet i 2009 med 11 personar og kom over 1.400 innbyggjarar, kallar forskaren ein milepæl. I Fyresdal er det stabilt med ein auke på to personar i fjor. 1.381 personar budde i kommunen ved årsskiftet.

Tri kommunar slit

Kviteseid, Tokke og Vinje har ei så negativ folketalsutvikling at Thorstensen kallar ho urovekkjande. Dei tri kommunane mista høvesvis 24, 26 og 21 innbyggjarar i 2009.

– Av landets 430 kommunar enda til dømes Tokke på 396. plass på folketalsstatistikken. Framgangen i Seljord gav kommunen ein 90. plass på oversikta over endringar i folketalet. Når ein går bakom tala og bryt dei ned på aldersgrupper, får ein fram eit godt bilete på at dei tri kommunane får stadig færre yngre og fleire eldre innbyggjarar. I løpet av fjoråret vart det i Vest-Telemark 61 færre personar i aldersgruppa 0 til 15 år. Det svarer til to skuleklassar, seier Audun Thorstensen.

Regionordførar Anne-Nora Oma Dahle er oppteken av at ein ikkje vert deprimert av folketalsstatistikken. Ho ser for seg ein snunad i Vest-Telemark dei næraste fem åra. Grunngjevinga er at både private verksemder og kommunane står framom eit generasjonsskifte, slik at dei vil tilsette mange nye personar om ikkje så altfor lenge.

– Som ordførar i Nissedal er eg glad for at pendelen har snudd ved at fleire personar har busett seg i kommunen. Når me no er over 1.400 nissedølar har me passert ei magisk grense, meiner Anne-Nora Oma Dahle.

Strålande nøgd

Seljordordførar Solveig S. Abrahamsen er strålande nøgd med auken i innbyggjartalet, og at alderssamansettinga i kommunen er sunn.

– No må me som politikarar syte for ein god kommunal økonomi som gjev rom for vidare vekst og gode tilbod til seljordingane. I tillegg er det viktig å ha gode og attraktive bustadtomter til disposisjon, seier ho.

– Kvifor syner Seljord seg å vere attraktiv?

– Eit godt og variert næringsliv med variert tilbod, og at me ligg geografisk sentralt med eit godt kollektivtilbod, trur eg er viktige faktorar, svarar Solveig S. Abrahamsen.

I Telemark auka folketalet i fjor med totalt 683 personar. Det plasserer fylket på 17. plass av dei 19 fylka i landet. Det er fødselsunderskot i fylket og det er utanlands innvandring som hindrar at Telemark enda sist på lista over folketalsveksten.

I Noreg stod folketalsauken i Oslo-området, Stavanger-området og Bergens-området for over 60 prosent av den samla veksten på til saman 58.947 personar i 2009.