Slåss vidare for eige lensmannskontor

Ordførar Olav Urbø (Sp) stadfestar at Tokke kommune vil slåss for lensmannskontor på Dalen også i framtida. Etter å ha lese rapporten om framtidig organisering av polititenesta i Vest-Telemark, er Urbø framleis kritisk til heile prosessen, som han kallar eit tingingsverk med sterke føringar.

Tokke-ordføraren finn ingen grunn til å kritisere prosjektgruppa lensmann Bjørn Håvard Olsen i Tokke har leia. Dei overleverte rapporten sin til politimeister Anne Rygh Pedersen denne veka. Gruppa konkluderer med at ei samanslåing av lensmannskontora i Kviteseid, Tokke og Vinje samla sett vil gje ei betre polititeneste enn dagens organisering. Dei stiller det ope kvar eit samanslått lensmannskontor skal vere lokalisert.

– Sjølv om eg er usamd i ein del ting prosjektgruppa legg fram i rapporten, vil eg gje ros for korleis dei har løyst oppgåve ut frå det stramme mandatet dei hadde fått av politimeisteren. Gruppa har hatt ei vrien oppgåve, vedgår Olav Urbø.

I rapporten vert ei samanslåing av lensmannskontor mellom anna grunngjeve med at det vil gje eit større fagmiljø for politifolka og lette rekrutteringa. Dette seier Urbø er kjente argument.

– Det eg er mest kritisk til ved at lensmannskontoret vert borte, er at det vert ei stor utfordring å halde trykket oppe på det førebyggjande arbeidet når politiet ikkje har lokal tilknyting. Når det vert skrive at denne ulempa må verte kompensert, er eg sterkt usamd i ei slik løysing. Eg meiner ein må ta utgangspunkt i denne problemstillinga i det vidare arbeidet, seier Tokke-ordføraren.

Tryggleikskjensle

Han peiker på at utanom førebyggjande arbeid er kvardagskriminalitet dei viktigaste politioppgåvene, og der innbyggjarane kjenner tryggleik ved å ha lensmannskontor i kommunen. Denne tryggleiken trur Urbø kan verte borte om polititenesta vert sentralisert i Vest-Telemark. Eg registrerer at dette er noko mange i politiet undervurderer og bagatelliserer. Over tid er ordføraren overtydd om at dei fleste politifolka vil busetje seg i nærleiken av lensmannskontoret.

Talmaterialet i rapporten vedrørande kostnadane ved ei samlokalisering, meiner Urbø vil verte monaleg dyrare enn kva gruppa har rekna ut.

– Alle røynsle fortel at fusjonskostnadane alltid endar høgare enn ein trudde på førehand, seier han.

Tek imot invitasjonen

– Er du nøgd med at politiet no inviterer til ein brei dialog med mellom anna kommunal deltaking før det vert konkludert?

– I alle høve har ikkje politiet offisielt konkludert om organiseringa av polititenesta i Vest-Telemark. Me får tru dei når dei hevdar at lokaliseringa er heilt ope. Tokke kommune vil sjølvsagt delta aktivt i den vidare prosessen politiet inviterer til. Eg har også lyst til å peike på at dersom det endar opp med at gruppas innstilling vert sett ut i livet med at lensmannskontora i Kviteseid, Tokke og Vinje samlokaliserast, så kan det aldri verte lokalisering i Åmot. Då er det Høydalsmo som peiker seg ut som den mest sentrale staden i distriktet, meiner Olav Urbø.

Tokke-ordføraren nemner elles at han legg merke til at politimeisteren ser for seg også ei samanslåing av politiet i Vest-Telemark og Midt-Telemark til ei driftseining.

– Det vil i så fall føye seg inn i eit mønster der alt til slutt endar i Bø, meiner Olav Urbø.