Streik i hotell- og restaurantbransjen frå måndag
(NPK-NTB): Over 2.600 tilsette i hotell- og restaurantbransjen går ut i streik frå måndag morgon etter at medlemmene i Fellesforbundet stemte ned forslaget til ny avtale i uravstemminga onsdag.
Eit klart fleirtal sa nei til den framforhandla avtalen mellom Fellesforbundet og NHO Reiseliv.
Artikkelen held fram under annonsen.
Forslaget som vart presentert 7. april, innebar eit timetillegg til alle på 2 kroner. Satsane for to års praksis vart heva med ytterlegare 50 øre i timen, medan fire, seks, åtte og ti års praksis skulle gi ein tilleggsauke på 1 krone.
Totalt blir 2.621 medlemmer i 69 hotell over heile landet tekne ut i streik. Det er første gong det blir konflikt for riksavtalen sidan Hotell- og restaurantarbeiderforbundet gjekk inn i Fellesforbundet i 2006.
Totalt organiserer Fellesforbundet rundt 7.000 arbeidstakarar innan hotell- og restaurantdrift.
Uravstemmingane for frontfaga, byggjeindustrien, byggfag og bil enda alle med at forhandlingsresultata vart godkjente.
