Vil vere føre var med bruvedlikehald

Statens vegvesen brukar millionsum på vedlikehald av to bruer på riksveg 41 sør i Nissedal kommune.

I fleire veker har det vore vedlikehaldsarbeid på Rv41-brua i Haugsjåsund. Halvor Uldal Kåsa i Vegvesenet fortel at jobben har med trafikktryggleik å gjere, mellom anna byter ein rekkverket og har overflatebehandling av stålet.

– Me ynskjer å vere i forkant slik at det slepp å bli øydelagt, og det rekkverket som stod der var ikkje bra. Viss me ikkje er i forkant blir vedlikehaldsarbeidet mykje dyrare og det kan bli stengt veg i periodar og nedsett akseltrykk, seier Kåsa. 

Det er bruavdelinga til NCC som har kontrakten om jobben i Haugsjåsund. Kontrakten har ikkje noko å gjere med den femårige drifts- og vedlikehaldskontrakten selskapet har for vegar i Vest-Telemark og som går ut snart. 

Kåsa seier arbeidet på brua vil koste over millionen.

Eit anna firma har fått kontrakt på å vedlikehaldet Rauå bru, som også er på Rv41 og ligg ved Tjønnefoss. Ikkje alt for langt unna, på fylkesvegen mot Fyresdal, skal det også kome vedlikehald på ei bru i år, opplyser Kåsa.