Arkitektar lanserer alternativ, grønare plan for datasenteret: – Bruk varmen til veksthus

Det planlagde datasenteret på Vesåstippen har potensial til å bli for stort, for høgt og for bråkete under planforslaget som i vår har vore på høyring, meiner arkitektane. Dei to arkitektane har begge røter i Bøgrend, og har tatt for seg det dei meiner er dei problematiske aspekta ved planen.

Dei viser til at det illustrerte planforslaget, med ei grunnflate på 14 350 kvadratmeter og ei høgde på 20 meter, er mindre enn det som står i planomtala, der det står at utbyggingspotensialet til område 1 i reguleringsplanen er på 16 600 kvadratmeter.

– At illustrasjonen er så misvisande i forhold til det som planforslaget faktisk opnar for, er særs uheldig då det svekkjer tilliten til prosessen og intensjonane bak planen. At illustrasjonane i tillegg er så langt unna ambisjonane kommunen har for etablering av eit datasenter skaper unødig mykje uro for naboar og andre råka, heiter det i høyringssvaret.