Caps eller ikkje caps – det var det store spørsmålet

Debatten om det skal vere lov å ha på caps eller ikkje i klasseromma i Seljord har fått nasjonal merksemd den siste tida med innslag i Dagsrevyen, debatt i P2 og Nyhetskompaniet . Det var ungdommane sjølve som tok initiativ til ei endring av ordensreglementet. Dei ønsker at det skal vere lov å ha på seg caps også i klasserommet. Då saka hamna hos politikarane i formannskapet, sa dei nei til forslaget frå ungdommane. 

– Det kan ikkje vere feil å lære den oppveksande generasjonen at når me kjem inn i ein undervisningssetting kan ein ta av seg capsen, lua eller ta av hetta. Det meiner eg ingen har vondt av, uttala Trond Johnsen (Ap) i møtet.

Torsdag var saka i kommunestyret for endeleg avgjerd. Innstillinga frå formannskapet vart samrøystes vedtatt, men det vart likevel ein del debatt og Ivar Barstad (R) hadde to tilleggsforslag som båe fall.