Christensen nummer fem på KrF-lista

Oddbjørn Nørstrud (21) frå Notodden toppar nominasjonslista til KrF i Telemark, på femteplass finn me vinbyggjen Bjørnar Christensen.

Av dei tolv kandidatane som står nominert på KrF si stortingsliste i Telemark er det fire vesttelar. Måndag blei nominasjonskomiteens liste samrøystes vedteke. Nominasjonskomiteen har blitt leia av nissedølen Øyvind Tveit.

Det er Oddbjørn Nørstrud frå Notodden som toppar lista til Telemark stemmekrins KrF.

– Nørstrud er 21 år, kjem frå Notodden, og har mykje erfaring frå politikken. Han var på debatt på alle dei vidaregåande skulane og skulane i Telemark i 2019 i samband med skulevala. Nørstrud sit i styret i lokallaget i Notodden KrF, han har delteke på fleire fylkesårsmøte og var delegat på siste landsmøtet til KrF i 2019, melder fylkessekretær Tone Strat i Vestfold og Telemark KrF i ei pressemelding.

Ho skriv vidare at det siste året har Nørstrud møtt i sentralstyret i KrFU, men blei valt som fast medlem på landsmøtet tidlegare i haust.

– Nørstrud er opptatt av å vere eit talerøyr for dei svake. Han vil vere med å ta ansvar for planeten vår. Dei fattigaste i verda er han også opptatt av, og at me har eit ansvar for å hjelpe, skriv Strat.

Lista blir endeleg avgjort på nominasjonsmøtet tysdag 24. november.