Departementet legg pengar på bordet for å høyre innbyggjarane i tvangssamanslåtte fylke

Fredag gjekk det ut brev til dei tvangssamanslåtte fylka om deling. Her kjem det fram at sjølv om fristen for å søke deling er skuva fram til 1. mars, meiner departementet at det er god nok tid til å høyre kva innbyggjarane meiner. Departementet vil òg bidra økonomisk.

I brevet frå departementet heiter det at fylkeskommunane kan søkje om inntil 100 000 kroner til utgreiing, og det doble til innbyggjarhøyring. Innbyggjarane kan ytra seg gjennom folkerøysting, spørjeundersøking eller møte, kjem det fram i brevet, som er underteikna Bjørn Arild Gram, kommunal- og distriktsminister.

– Pengar og tid skal ikkje vera argument for ikkje å høyre kva innbyggjarane meiner i fylka som har blitt slått saman med tvang av Solberg-regjeringa, seier Åslaug Sem-Jacobsen, som representerer Telemark Senterparti på Stortinget.