Det blei skote 64 gauper i årets kvotejakt – 9 blei påkøyrd

Gaupejakta 2021 starta 1. februar og blei avslutta 31. mars. Ei årsak til at ikkje heile fellingskvoten på 83 dyr blei fylt opp, var at jakta blei stansa i fleire område fordi hodyrkvoten var nådd.

Miljødirektoratet opplyser at av dei 73 gaupene som blei belasta kvoten, er 64 felte av jegerar, 2 blei avliva ved skadefelling og 7 er påkøyrd. I tillegg til desse 7 blei 2 gauper påkøyrd i kvotefri region 5, som er Hedmark.

I region 2, Sør-Noreg der Telemark er med, var kvoten 32 gauper. Samla avgang var 25 dyr, av desse blei eitt påkøyrd.