– Det vil alltid vere slik at ein kan ha potensial for forbetringar og ingen er ufeilbar

Sidan i sommar har kontrollutvalet i Tokke mottatt eit varsel og eit bekymringsbrev som begge handlar om arbeidsmiljøet i kommunen. Kommunedirektøren svarar på kritikken.

Begge skriva har anonym avsendar, og kontrollutvalet skriv at begge breva «gjev uttrykk for bekymring med arbeidsmiljøet i Tokke kommune, og rettar særleg fokus mot kommunedirektøren sin leiarstil og handlingar.»

VTB har sett innhaldet i bekymringsbrevet, men ikkje i det anonyme varselet som har kome til kontrollutvalet. Sidan i sommar har også VTB mottatt fleire tips, alle anonyme og alle med innhald som kan oppsummerast på same måte – dei er kritiske og uttrykker uro for arbeidsmiljøet i Tokke kommune.

– Må ta vanskelege avgjersler

Finn Arne Askje har vore kommunedirektør i Tokke sidan 2021, då hadde han alt fungert i jobben ei tid som konstituert rådmann. Askje kom frå jobben som kommunalsjef for oppvekst i same kommune.

– Kjenner du deg att i kritikken?

– Det vil alltid vere slik at ein kan ha potensial for forbetringar og ingen er ufeilbar. Men samstundes er jobben som kommunedirektør krevjande ved at ein må ta vanskelege avgjersler overfor tilsette eller innbyggjarar, som enkelte ikkje er samde i. Eller at ein må gjennomføre endringar på mange plan som berører tilsette, svarar Askje.

– Korleis vil du beskrive leiarstilen din?

– Kommunedirektørens viktigaste oppgåve og ansvar er å sikre at ein gjev brukarane gode tenester, innan dei styringssignala og vedtak som kommunestyret set. I den samanheng er dei tilsette ein svært viktig ressurs, svarar kommunedirektøren.

– Som leiar vil nok mange oppleve meg som å vere oppteken av å nå fastsette mål, å kunne ta tak i vanskelege problemstillingar på vegen mot målet og å vere omsorgsfull og kunne ta andre sitt perspektiv i den samanheng, legg han til.

Innfører tiltak

Då kontrollutvalet hadde saka oppe i starten av oktober, gjorde sekretær, Marianne Lundeberg, det klart at kontrollutvalet ikkje kan gå inn å rydde opp i ei arbeidsmiljøsak.

Ordførar, Jarand Felland, orienterte om situasjonen, og utvalet ber om at kommunestyret får på plass rutinar for korleis kommunen skal handtere varsel på øvste leiar. Han informerte om fleire ulike tiltak som kommunen har valt å setje i gang. Mellom anna ei undersøking blant alle tilsette og sluttsamtale med alle som sluttar i kommunen.

– Då får me ein status, og vil vurdere utifrå tilbakemeldingane der om me må gjere meir, sa Felland då han orienterte i kontrollutvalet.

Og kommenterte vidare:

– Me må berre erkjenne at alle organisasjonar kan bli betre. Også Tokke kommune.

– Kva meiner du om tiltaka som har blitt og blir innført?

– Tiltaka som skal gjennomførast er omforeint mellom formannskapet og kommunedirektøren, svarar Askje.