To er smitta i Tokke – omfattande smittesporing pågår

Ordføraren beklagar at ein barnehage ikkje blei stengt torsdag kveld.

Tokke-ordførar Jarand Felland la fredag føremiddag ut denne meldinga på Facebook:

«Ein person busett i Tokke er smitta av covid-19. Vedkomande har eit born på ei av dei to småbarnsavdelingane.

Småbarnsavdelingane er ein kohort. Tilsette og ungar har ikkje kontakt med storbarnsavdelingane.

Småbarnsavdelingane er stengt for resten av dagen. I går kveld burde det vore teke ei avgjerd om dette, for å vere på den heilt sikre sida. Det beklagar eg at ikkje skjedde.

Meir informasjon vil kome i løpet av dagen.»

Det er småbarnsavdelingane i Dalen barnehage som er stengt.

Kommunen skriv på heimesida at tre personar er i karantene og to i ventekarantene. Fleire prøveresultat er venta i løpet av dagen.

Fredag kveld kom det ny oppdatering frå kommunen:

«Eit nytt smittetilfelle er registrert i Tokke: I dag blei det registrert eit nytt smittetilfelle, etter positivt resultat på hurtigtest. Svar på PCR-test er venta i morgon ettermiddag. Det pågår no omfattande smittesporing. Kriseleiinga har hatt møte i kveld 23.04, og skal ha nytt møte i morgon kl. 19.00. Då er det forventa at svar på PCR-test ligg føre for prøvetaking knytt til begge dei to smittetilfella i Tokke, og kriseleiinga vil då avgjere evt tiltak i høve til smittesituasjonen.»