Ein vevar med mange jern i elden

Gjennom førti år har Ann Mari Jore vore ei drivkraft for handverkstradisjonane våre, og ho er framleis i full sving. 

Ann Mari har jobba for å spreie tradisjonshandverka på mange arenaer, til dømes ved å drifte sommarkursa til Raulandsakademiet og gjennom ulike opplegg for kulturskulen og universitetsstudentane.

I tillegg er ho sjølv ein fyrsteklasses handverkar som har utmerka seg med formgjeving, veving og maskinstrikking. Utdanning som vevlærar tok ho i Oslo, Budapest og på folkekunststudiet i Rauland. Så blei ho sjølv lærar på akademiet, der ho vidareutvikla kursa deira og gjorde dei kjende over heile landet.