Fem hundre ynskjer konsekvensutgreiing om eigedomsskatt

Seljord næringslag gjekk i juni ut og bad kommunen finne ut av konsekvensane den vedtekne eigedomsskatten vil påføre næringslivet i bygda før skatten blir sett ut i livet. Næringslaget starta også ei underskriftskampanje.

– 499 personar responderte med å signere namnet sitt på dei fysiske og digitale listene som blei lagt ut, og me opplevde eit kjempestort engasjement og fekk høyre mange triste historier. Mellom anna om folk som har vurdert å etablere seg i Seljord, men som droppar det på grunn av høge kommunale avgifter som vil bli endå høgare dersom ein får eigedomsskatt på toppen, seier leiar av Seljord næringslag, Hilde Hagen-Nielsen.

Arnt Helge Hauglid seier at dei har jobba for næringslivet med denne aksjonen, men at dei også har fått mange innspel frå private innbyggjarar som vil slite om det blir endå ei avgift å betale.