Hevar aldersgrensa på «heim for ein 50-lapp»

Tysdag handsama oppvekst- og velferdsutvalet (OVU) saka om «heim for ein 50-lapp». Dei vedtok samrøystes kommunedirektørens framlegg om å setje i verk tiltak slik at ordninga verkar som den var tenkt: 

«Eit tiltak som skal dekkje opp for manglande kollektivtilbod i kommunen slik at ungdom kan kome seg heim frå aktivitetar og arrangement til ein rimeleg pris, og som skal verke førebyggjande mot ruskøyring.»

I tillegg føreslo OVU-leiar Kari Omdal Tveito (SV) at ordninga skal gjelde aldersgruppa 16-25 år. Fram til nå har den vore for 13-25 år. Forslaget til Tveito vart vedtatt med 6 mot 1 røyst. Dermed vil ikkje lenger elevar i 8. og 9. klasse kunne nytte taxiskyssen heim frå ungdomsklubb, som har vore det ordninga har blitt mest nytta til dei fyrste to månadane av 2025.