I 2040 er det nesten dobbelt så mange over 80 år i kommunen. – Må bruke neste år til å finne ei løysing

– Ei fagleg forsvarleg eldreomsorg føreset investeringar og ei vesentleg auke i driftskostnadane. Det er ikkje mogleg å få denne auken inn i budsjett og økonomiplan slik det ligg per i dag, skriv kommunedirektør Beate Våge Lia om situasjonen i Seljord kommune.

For to veker sidan fekk kommunestyret ein ganske stor smakebit av budsjettarbeidet til administrasjonen i Seljord kommune. Måndag sende Beate Våge Lia ut det endelege framlegget til budsjett og økonomiplan 2025–2028. Blant det kommunedirektøren ikkje har funne plass til er utbygginga på Nes – prosjektet som har stått sentralt i å løyse den største utfordringa i kommunen i tida framover, nemleg den markante auken i talet på eldre.

Det betyr ikkje at prosjektet er føreslege skrinlagt. Kommunedirektøren er klar på at politikarar og administrasjon i løpet av 2025 må arbeide fram «ei løysing for dimensjonering av investering og drift og korleis finansieringa kan skje».