Kommunen blir ikkje med på røyeemisjonen. – Er tida inne for å hoppe av og selje aksjane? 

Kommunedirektøren tilrådde å gå inn med ytterlegare 710 000 friske pengar i ei emisjonssak om lokale Telemarkrøye AS. Dette sa eit knapt fleirtal i formannskapet ja til, før saka blei sendt til kommunestyret for endeleg avgjerd torsdag kveld.

Knut Lofthus (Ap) var fyrst ute for å seie si meining om endå ei løyving til røyeverksemda. Han byrja med at saka om emisjon i utgangspunktet er grei, og at det er positivt at kommunen eventuelt vil vere med på noko slikt. Men så:

– I og med at kommunen dei seinare åra ikkje har hatt all verda med pengar til disposisjon og me har utvida årets budsjett med fem millionar kroner, meiner eg me bør gå imot løyving. Årsaka er den økonomiske situasjonen til kommunen, sa Lofthus om forslaget sitt.