Meir pengar til politiet for å kjempe mot gjengkriminalitet

Stortinget vedtok revidert nasjonalbudsjett 21. juni. Løyvingane til politiet aukar med totalt 1,82 milliardar kroner, og av desse går 155 millionar til å oppretthalde talet på politiårsverk og 300 millionar til satsing på tiltak mot kriminelle nettverk.

Då kriminelle nettverk er ein nasjonal trussel som krev ein felles nasjonal innsats har regjeringa bestemt at satsinga blir vidareført varig med 600 millionar i budsjettet for 2025 også. Av desse skal 39,3 millionar gå til Sør-Aust politidistrikt. Det skriv Åslaug Sem-Jacobsen og Lene Vågslid i ei pressemelding.

Dei to telemarkingane representerer høvesvis Senterpartiet og Arbeidarpartiet på Stortinget, og meiner kampen mot organisert kriminalitet og kriminelle nettverk er viktig og at fordelinga av midlane er klok.