Oppdaga brannen tilfeldig. – Me har blitt veldig merksame på at me har kvarandre

Det var sundag føremiddag det byrja å brenne i eldhuset hos Elisabeth og Olav Hagen Kvalem på Suigard Nordgarden ved Dyrskuplassen i Seljord.

Olav skulle opp på arbeidsrommet i eldhuset då han kjente ei lukt. Då han opna ytterdøra kjente han røyklukt og høyrde brannvarslaren ule. Han sprang opp for å vekke sonen som låg og sov i andre etasjen.

Då han kom ned att opna han døra til kjøkenet. Då velta røyken ut. Dei kom seg ut av huset. Kona fekk tak i hageslangen som ho drog med seg til eldhuset. Med ein takstein knuste dei vindauget og sette i gang å sløkke.