Ordføraren forventar at politikarane tek grep og overstyrer politiet. – Ingen samanheng mellom stillingane i Vinje og Seljord, svarar statssekretæren.

Denne veka kunngjorde politileiar i Telemark, Dag Størksen, at dei fire stillingane regjeringa har bestemt at politikontoret i Seljord skal styrkast med, alle vil bli tekne frå Vinje.

– Me har eit strammare budsjett i år enn i fjor, og det aller meste av budsjettet vårt går til løn. Me har ikkje råd til å løne så mange i år som me gjorde i fjor, og då må også Vest- og Midt-Telemark bidra, sa Størksen til VTB, som vidare kunngjorde at dei ventar å måtte gjennomføre eit kutt på totalt ti stillingar i Telemark i 2023.

Vedtaket frå regjeringa innebar, i tillegg til styrking av politikontora på Hitra og i Seljord med høvesvis to og fire årsverk, at ni nye tenestestader ville bli oppretta.