Politiet er uroa. – Det er berre eit tidsspørsmål
Dei siste to helgene har fleire unge vesttelar blitt tatt for promillekøyring. Sigrid Dahl i politiet er bekymra.
12.11.23: Rauland: Ein mann i slutten av tenåra stoppa av politiet med mistanke om alkoholpåverknad. Prøver er tatt. Bileigar var passasjer og blir derfor meldt for medverknad til promillekøyring.
12.11.23: Kviteseid: Ein mann i slutten av tenåra blei stoppa i Kviteseid. Det er mistanke om at han var påverka av alkohol.
Artikkelen held fram under annonsen.
19.11.23: Rauland: Politiet stoppa ein bil på Raulandsvegen i Vinje. Patruljen mistenkte at føraren, ein mann i 20-åra, var påverka av alkohol. Også passasjeren blir meld for medverknad.
Dette er ferske nyheitssaker frå Vest-Telemark blad. Politistasjonssjef Sigrid Dahl i Midt- og Vest-Telemark politidistrikt kan ikkje fastslå at fleire køyrer i fylla enn før – men ho er klar på at problemet framleis er omfattande. Og det er unge sjåførar politiet stoppar.
– Det gjer oss uroa, seier Dahl til VTB.
Ho seier politiet prøvar å vera der «dei bør vera», men at dei er avhengige av tips frå innbyggjarane for å avdekke fyllekøyring i den store regionen.
– Me er veldig takksame for dei som seier frå. Dei bidrar til å redde liv, understrekar Dahl.
– Det er ikkje berre slik at dei som blir tatt skal køyre heim frå fest, men nokon tek seg ein køyretur når dei er på fest, held ho fram.
Sundag blei FNs verdsminnedag for trafikkofre markert. Ved utgangen av oktober viste statistikk frå Trygg trafikk at 111 personar har omkome i trafikkulykker til nå i 2023. Det er fleire enn på same tid i fjor. Sigrid Dahl er bekymra for at ei ny tragisk ulykke kan skje.
– Sjølv om me har vore skåna for dei alvorlege ulykkene i det siste, tyder aktiviteten på at det kjem til å skje. Det er berre eit tidsspørsmål, fryktar Dahl.
Artikkelen held fram under annonsen.
Me er veldig takksame for dei som seier frå. Dei bidrar til å redde liv.
Tal VTB har henta inn frå Midt- og Vest-Telemark politidistrikt viser at kvart år blir i underkant av 100 personar tatt for fyllekøyring i distriktet. Med to månader att av året har politiet til nå i år tatt 76 personar.
