Regjeringa fjernar einmeterskravet i høgare utdanning

Studentar treng ikkje å sitje minst éin meter frå kvarandre når skuleåret startar. Andre skular blir tilrådde å starte på grønt nivå.

– Vi har ei god nyheit til studentane. Vi gir unntak frå avstandskrav under undervisning, sa helseminister Bent Høie (H) på ein pressekonferanse fredag.

Helsedirektoratet og Folkehelseinstituttet har råda regjeringa til å gjere dette no, og ikkje i trinn fire som planlagt.

– Det betyr at studentar endeleg kan møtast ansikt til ansikt i klasserom, og sitje skulder ved skulder i forelesingssalane, etter halvanna år med restriksjonar, sa Høie.

Han la til at regjeringa forventar at smitten aukar når dette skjer.

– Morosam og tryggare studiestart

Tidlegare denne veka vart det kjent at staten tek rekninga for omfattande testing før sosiale arrangement i samband med studiestart ved fagskular, høgskular og universitet.

– Vi har sponsa faddervekene med 40 millionar kroner og tek rekninga for hurtigtestane. Til saman er eg sikker på at dette gjer at det blir ein kjekkare og tryggare studiestart enn i fjor, seier forskings- og høgare utdanningsminister Henrik Asheim (H).

Utsett to gonger

Gjennomføringa av trinn fire har vorte utsett to gonger, begge gonger grunna bekymring knytt til deltavarianten, som i større grad smittar vaksinerte.

Håpet til regjeringa er at det skal vere mogleg å leve normalt – utan avstandskrav og andre avgrensingar innanlands – når alle vaksne har hatt moglegheit til å få to dosar.

Tidlegare var det anslått at dette kunne skje mot slutten av september, men fredag kom nyheita om at Noreg får éin million fleire Moderna-dosar. Statsminister Erna Solberg sa fredag til VG at dette vil innebere at gjenopninga blir påskunda med to veker.