Simone og Dietmar gler seg til gardslivet. – For ein nydeleg plass det er
Det blir mange små husdyr på garden Flatland når Simone D. og Dietmar Winkler tek over – og nokre større etter kvart.
Publisert
Sist oppdatert
– Me gler oss stort til å flytte inn på Flatland og bli kjent med våre nye naboar i Raulandsgrend, seier Simone til VTB.
– For ein nydeleg plass det er, me er så heldige!
Annonse
Ekteparet bur i Siljan, men har kjøpt garden Flatland i Raulandsgrend. Førre veke fekk dei konsesjon, og nå ser dei fram til å flytte til den idylliske eigedomen ved Totak.
Bier og alpakka
Simone er sertifisert birøktar og dei to har planar om å drive med birøkt på garden, men ser også føre seg at det kan bli anna dyrehald i framtida.
– Eg kjem til å fortsette med birøkt framover, men i tillegg kjem det til å flytte nokre alpakka inn etter kvart. Det skal bli alpakka-opplevingar og småskala garnproduksjon, men fyrst må me gjere alt klart til å ta dei imot.
Annonse
Båtfolk og fjellturistar er velkomne
Garden dei har søkt om konsesjon på har mellom anna to bustadhus, ein driftsbygning og ei hytte. Den har også ei båthamn som har blitt brukt av folk som vil ut med båt på Totak, og ein parkeringsplass på nordsida av vegen som har blitt nytta av turgåarar som vil opp til Tehytta som ligg ovanfor garden. Slik blir det også når Simone og Dietmar tek over.
– Me held båtslepp-plassen tilgjengeleg for alle som ønsker å bruke den, og parkeringsplassen til Tehytta vil me også drive vidare, fortel Simone.
