Skal byggje opp til seks meter høg mur for å sikre mot snøskred

Denne vinteren blir den siste utan skredsikring for Byrte, melder Vestfold og Telemark fylkeskommune i ei pressemelding.

I fjor vart det gamle geofonanlegget ved Heggtveitrøti erstatta med ein ny radar som gir færre falske alarmar enn det gamle. No skal fylkesvegen sikrast ved Bergstøyl og Ristøyl.

– Alt den 14. desember skal vi ha tilbodskonferanse i lokala våre i Seljord, fortel prosjektleiar Lisbeth Lehn Fosse i Vestfold og Telemark fylke. På grunn av splittinga av fylkeskommunen, er det Vestfold og Telemark fylke som lyser ut konkurransen, medan det blir nye Telemark fylke som vil inngå kontrakten neste år.