Tomta er klar, men fire leilegheiter til må bli signert før spaden kan settast i jorda

Både i kommunestyret og på seniordagane i Vinje har ei ny tverrfagleg «innsatstrapp» blitt presentert. Denne trappa skildrar tiltak for å sikre at innbyggarane i kommunen får dei tenestene dei skal. Lågt nede i trappa er det fokus på inkludering, førebygging og tidleg innsats, og dess høgare opp i trappa ein kjem, dess meir inngripande – og kostbare – vert tiltaka.

Eit av dei førebyggande tiltaka i innsatstrappa er å satse på sentrumsnære og tilrettelagde bustadar for eldre. Slike bustadar er planlagt i burettslaget Heimdal 60+, og dei vert ikkje så dyre å kjøpe heller, forklarar Halvor Vasshus. Han er ein av dei engasjerte pensjonistane i prosjektgruppa som har stått på for at Heimdal 60+ skal bli verkelegheit.

– Ein betalar berre halve summen for leilegheita i fyrste omgang, noko som utgjer kring to millionar. Den andre halvdelen av kjøpesummen er avdragsfri i 20 år, seier Vasshus.