Tone var på utestaden då gjerningsmannen opna eld mot gjestene: – Han skaut vilt rundt seg

– Eg er framleis veldig skjelven, og har ikkje sove eitt minutt. Det er røyndomsfjernt og tomt, seier Tone Dahl morgonen etter terroråtaket i Oslo.

To personar vart drepne og 21 skadde då den 42-år-gamle mannen, som no er sikta for terrorhandlingar, drap og drapsforsøk, gjekk til angrep på to utestader i hovudstaden. Fyrst ved utestaden Per, der to mista livet, så London pub.

– Eg var på London pub i lag med lesbiske og homofile vener og feira Pride. Det var kjempestemning og hadde vore ein veldig fin kveld, fortel Dahl, som opphavleg kjem frå Kviteseid.