Yngres i Vrådal fekk Diakoniprisen

Yngres i Vrådal har vore eit tilbod til barn og unge i meir enn 30 år.

Sundag kveld mottok Jan Gunnar Breivik, Astrid Breivik og Håkon Birkeland Diakoniprisen i Vest-Telemark.

På Yngres i Vrådal møtest unge til positive samvær i ulike aktivitetar og knyter sterke venskapsband på tvers av alder. Yngres er ein populær møtestad og omtrent alle skulebarn i Vrådal har vore innom møta gjennom meir enn 30 år.

På det meste har det vore samla om lag 40 ungar. Etter at barn i Vrådal har skulekvardagen i Kviteseid, er det ekstra viktig med denne samlingsstaden i Vrådal.

Yngres er eit tilbod innan trusopplæringa i Den norske kyrkja. Heilt fram til 2020 var bedehuset møtestaden. Nå er dette bygget seld og Yngres har fått plass på Straumsnes skule.

På møtekveldane er det sløydprega aktivitetar, matøkt, song og andakt.

Håkon Birkeland starta Yngres i 1988 og etter 10 år blei Astrid og Jan Gunnar Breivik med som leiarar. I dei seinare åra har også elevar ved Kviteseid gymnas deltatt.

Diakoniprisen for Vest-Telemark, i denne samanhengen Tokke, Vinje, Nissedal, Fyresdal og Kviteseid, er til påskjøning og oppmuntring til grupper, foreiningar eller lag som på ein særleg måte har vist diakonal omsorg, eller vore med på å bevisstgjere og motivere andre til diakonal innsats i Vest-Telemark.

Om lag 100 personar var til stades på diakonisamlimga, der kyrkjerådsleiar Kristin Ggunleiksrud Raaum snakka om diakonien i framtidas kyrkje.