Fleirbrukarar feirar i fleng

I fleire tiår har nissedølar etterlyst eit fleirbrukshus og idrettshall i kommunen. Snart er ventetida over. Gjennom ei heil veke i oktober skal innbyggjarane feire opninga av storstoga som skal huse mange aktivitetar ved Tveit skule i Treungen. – Gjennom denne veka ynskjer me å vise kva som rører seg i organisasjonslivet i kommunen, seier Anne Margrethe Espelid, einingsleiar for kultur i Nissedal kommune.

Nissedal kommune si nye storstoge ved Tveit skule skal stå ferdig 1. august. Då skulen ikkje er i gang på den tida, og truleg heller ikkje organisasjonslivet i særleg grad, blir opninga av det etterlengta fleirbrukshuset lagt til 17. – 24. oktober.

Planen er å markere hendinga på mange ulike måtar. Det som alt er spikra er ein kulturkveld og offisiell opning fredag 17. oktober. I den samanhengen tek kommunen den neste tida gjerne imot forslag på kandidatar til kulturprisen.

Familiedag

– Me skal feire og tenkjer aktivitetar ei heil superveke. Hovudtingen er å vise at me har eit fleirbrukshus som kan brukast til mykje, seier Anne Margrethe Espelid, einingsleiar for kultur i Nissedal kommune.

Espelid, Wenche Braatlund Larsen, Tone Lundeberg Reinholt, Leif Arild Sanden og Olav Svalastog sit i ei gruppe som dreg i gang planlegginga av opningsveka. Tanken så tidleg i fasen er mellom anna å ha ein familiedag med ope hus, barneteater, kinokveld, konsert og ungdomskveld.

No blir lag og foreiningar i kommunen inviterte til å kome med diverse innslag i opningsveka. Sjølvsagt skal det bli høve til å trene i den nye idrettshallen denne perioden. Er det til dømes eit idrettslag som synest det er ein god idé å ha eit turneringsopplegg, er det bra om dei tek seg av gjennomføringa.

– Gjennom denne veka i oktober ynskjer me å vise kva som rører seg i organisasjonslivet i kommunen. Me håper mange har lyst til å kome med bidrag, utfordrar einingsleiaren.

Vidare vil det framover vere ei tevling om utsmykkinga i storstoga. Dessutan er det høve til å kome med namneforslag på nybygget.