Fredstrea ved Totak

I skøytet frå 1939 vart hytteeigendomen kalla Kjelarhaugen. Ein liten grusrygg på ein odde om lag to kilometer vest for Rauland kyrkje. Kanskje var det ein jordkjellar i den fine og tørre grusryggen ein gong?

Halvor Ingolfsrud kjøpte tomta og bygde hytte ved Totak i 1939. Kanskje dei såg det som ein trygg plass når stadig fleire land vart råka av krig? Det veit me ikkje, men det var ikkje så lettvint å «ta ein tur» på hytta då den stod ferdig. I hytteboka har dei skrive om reisa til hytta sumaren 1942. Fyrst tog frå Drammen til Skien, så kanalbåten opp til Dalen der dei overnatta. Så med buss til Åmot, lastebil til Krossen og hesteskyss dei siste kilometarane til hytta. Ein fekk jo ikkje lov å køyre bil. Andre gonger tok dei tog til Rjukan og buss til Haddeland eller gjekk på ski over til Rauland. Stort sett måtte dei rekne 1-2 dagar på reisa. Om sumaren var familien på hytta i 6-7 veker. Dei fiska, plukka bær og var det ein god sumar og haust kunne dei ha med syltetøy heim. I hytteboka les me at sommaren 1942 var kald og våt – det blei lite bær og fisk.

«Det er en kamp for hver smule mat», står det i hytteboka.