Villmarkshotellet Canvas. – Det skal vere litt luksus

Dei fleste kjem til Canvas hotell for å sykle, og gjestene kjem ofte langvegsfrå. Denne sundagen har hotellsjef Svendsen reservert heile hotellet til lokale gjester frå Nissedal. Han synest det er fint at dei som bur i kommunen også får oppleve glamping-livet i Heimdal, og håpar dette kan bli ein årleg tradisjon.

Mongolske yurtar

Det særeigne hotellet ligg langt inne på heia. Hit er det ikkje bilveg. Ein kan sykle til overnattingsstaden frå fleire kantar, på ein av stiane som er tilrettelagt. Området er kjent for mykje svafjell, og i tillegg er det bygd klopper og hengebruer slik at ein kan kome seg fram med sykkel både over myrer og bekkar. Ein kan sjølvsagt også rusle inn til hotellet. Det tek om lag ein halvtime om ein køyrer til endes på den private grusvegen.