Knut Oddvar, Even og Herdis blei heidra for innsatsen i Treungen idrettslag

– Sidan me ikkje fekk til å samlast i fjor blei det heile tre prisar å dele ut i år, to eldsjelprisar og ein ærespris, seier idrettslagsleiar Elin Fjalestad.

Knut Oddvar Nes fekk æresprisen. Han har gjort svært mykje for laget vårt, i veldig mange år. Han har sjølv vore aktiv fotballspelar, både på gutelaget og seinare på a-laget. Han har vore fotballtrenar, vore med i fotballstyret og i hovudstyret. Knut Oddvar har utført mykje praktisk arbeid både på klubbhuset, på idrettsbanen og ikkje minst på Skuggenatten. Han har vore sentral i arrangørgruppa for Skuggenatten Opp og Telemarks tøffaste. Han er å sjå på både store og små arrangement, og gjer mykje arbeid som ikkje alltid er like synleg. Blant anna tømmer han Skuggedassen kvart år. Dei siste åra har han vore engasjert i klatregruppa og klatrefestivalen.

– Me veit ikkje kor mange timar Knut har brukt på laget vårt, men det er mange! seier Fjalestad.