Runar skal heim å finne storformen. Målet er å klatre heilt øvst på pallen i løpet av vinteren

Runar Skaug Mathisen tek joleferie på 20. plass i samandraget i Visma Ski Classics.

Bjønnen frå Kostveit var blant dei 20 beste i begge renna i den fyrste konkurransehelga i langløpssirkuset, i Bad Gastein i Tyskland, 9.-10. desember – 17. plass på tempoen og 11. plass på sundagens fellesstart. I helgas to renn gjekk Skaug Mathisen inn til ein 28. plass på fellesstarten laurdag og ein 33. plass på tempoen dagen etter, og går inn i 2024 på 20. plass i samandraget.

– Eg synest eigentleg sesongstarten har vore bra, med unntak av resultata. Me har hatt litt trøbbel med skia, så me er i dialog med smøreteamet, fortel han.

– Og kroppen har framleis litt å gå på, men det er ein lang sesong. Eg håpar å ha litt og spe på med – både betre form og betre ski utover i sesongen, held han fram.

Dei største og viktigaste renna i sesongen kjem fyrst på nyåret, det er særleg Marcialonga, Vasaloppet og Birken som heng høgt. I 2023-utgåva av sistnemnde gjekk han inn til 3. plass, den andre pallplasseringa i karrieren, i tillegg til 2.-plassen frå Årefjellsloppet i 2022. I år håpar han å toppe desse.

– Målet er å vinne eit renn, konstaterer Mathisen.

– No har eg éin 2.-plass og éin 3.-plass, så det er berre den øvste pallplassen som manglar, held han fram.

Den fyrste sjansen kjem 13. januar, på den italienske sida av dei tyrolske Alpane, då det er duka for 3 Zinnen Ski Marathon. Før det ventar vel og merke jolefeiring heime på Kostveit – og forhåpentlegvis godt skiføre.

– Då skal eg finne storformen, lovar 30-åringen.